Disa koktail qe perdoren ne Baret shqipatre por dhe jashte t - Forum
  Thursday, 2016-12-08, 5:54 AM
Welcome Guest | RSS
 
 
Main Page | Disa koktail qe perdoren ne Baret shqipatre por dhe jashte t - Forum | Register | Log in
[New messages · Members · Forum rules · Search · RSS ]
Page 1 of 11
Forum » Arti & Kultura » Kuzhina Shqiptare » Disa koktail qe perdoren ne Baret shqipatre por dhe jashte t
Disa koktail qe perdoren ne Baret shqipatre por dhe jashte t
dj_diamantDate: Wednesday, 2007-08-15, 11:20 AM | Message # 1
Admin
Group: Administrators
Messages: 267
Reputation: 0
Status: Offline

Gjithçka qëndron te përzierja, sepse të dish të bësh diçka të tillë,
është art. Është një nga pijet më të dashura, që ndihmon në ndezjen
akoma më shumë të netëve përvëluese të verës. Një koktejl i mirë
kërkon gjithmonë të arrijë ekuilibrin perfekt mes përbërësve të
ndryshëm me të cilët përgatitet


Personazhet e kuzhinës

Një koktejl të lutem, në një gotë të
madhe nga ato që përdorni për
shampanjë”. “Po zotëri, prisni
vetëm një minutë ju lutem. Atëherë, le të
përziejmë tri porcione “Gordon”, një porcion
vodka dhe gjysmë “Kina Lillet”. I
përziejmë fort deri sa janë të ftohta, ndërsa
në fund i shtojmë një fetë të hollë limoni”.
Kur shkrimtari i famshëm britanik,
Jan Fleming, shpiku koktejlin, për heroin
e tij të ri James Bond, sigurisht nuk e
dinte që kjo përzierje magjike do të shëtiste
botën. Në të vërtetë, një koktejl është
një përzierje lëngjesh të ndryshme, me
shtimin e përbërësve të tjerë si: sheqer,
fruta, akull apo edhe pije joalkoolike. Fjala
koktejl shfaqet për herë të parë në revistën
e 16 majit të vitit 1806 të “Balance
and columbian repository”, ku jepet
shpjegimi i mëposhtëm: “Koktejli është
një pije stimuluese, përbërë nga substanca
të ndryshme alkoolike, të cilave u
shtohet sheqer, ujë dhe fruta aromatike”.
Manuali i parë i plotë që përfshinte receta
të ndryshme koktejli i takon vitit 1862,
i quajtur “The bartender guide: how to
mix drinks”, i banakierit të njohur Xherry
Tomas. Po nga i njëjti autor disa vjet më
vonë doli edhe “The bon vivant2s Companion”.
Aty, Tomas, përveç listës së
pijeve të zakonshme, me një përzierje
lëngjesh të tjera, kishte shkruar rreth
dhjetë receta, të cilat ai i kishte quajtur
“Coctail”. Sipas tij, përbërësi kryesor i
koktejleve nga pijet e tjera në atë kohë
ishte përdorimi i lëngjeve paksa të hidhura
edhe pse tashmë ky lloj përbërësi nuk
gjendet në pothuajse asnjë nga recetat
moderne. Po ashtu, profesori përpiqej të
shpjegonte edhe prejardhjen e kësaj
fjale, që sipas tij derivonte nga ajo
franceze, “coquetel”. Në Amerikë, në
vitet 1919-1933, kur konsumi i alkoolit
ishte i paligjshëm, koktejlet piheshin
fshehurazi në shumë klube nate.
Meqenëse nuk mund të konsumohej alkooli,
për ta hequr të gjithin nga qarkullimi
baristët tentonin të përzienin pijet me
njëra-tjetrën, duke u shtuar njëkohësisht
edhe përbërës të tjerë si limon, borzilok
apo fruta. Por edhe pse nisi si lojë,
pikërisht kësaj periudhe mendohet se i
takojnë edhe “recetat” e para të koktejleve
të kohëve moderne. Në ato vite
(1927-1931) në Evropë doli një përmbledhje
që titullohej “900 receta koktejli”,
ku përfshiheshin ato të përgatitura
nga banakierë francezë dhe anglezë.

Pak histori
Në fillim ishin romakët e vjetër ata që
filluan të bënin përzierjen e verës me
mjaltin, të cilën pastaj e përdornin si
aperitiv. Më vonë kjo traditë u përhap me
shpejtësi në Uells dhe më pas në Britani,
ku vazhdon të ruhet edhe sot. Megjithatë,
ishte gjatë mesjetës dhe më pas rilindjes
që përzierjet e ndryshme me
lëngje dhe verëra u ngritën në rangun e
një arti më vete dhe ata që merreshin me
këtë punë ishin njerëz të specializuar.
Mbretëresha e Francës, gruaja e Henrit
II, Katerina de Mediçi, u konsiderua si një
nga ekspertet më të mëdha të kësaj fushe
në atë kohë. Ajo kishte mësuar prej
mjekëve të saj se, duke përzierë disa pije
alkoolike me erëza të ndryshme, mund të
përfitoje “ilaçe” që të qetësonin dhe të ngjallnin
dëshirën për të jetuar. Në disa shkrime
të asaj kohe shkruhej: Kur mbërrita
në Nju Orlins, në vend që të shkoja të
dëgjoja Luis Armstrongun, i cili do të zhvillonte
një sërë koncertesh të mrekullueshme
nëpër qytetet amerikane,
ndoqa këshillën e një banakieri dhe shkova
në një lokal, në “Royal Street”. Rrugës
më zuri syri një shtëpi të vogël, nga ato të
viteve 800, ku ishte shkruar: “The coctail
is born” (“Koktejli ka lindur”). Më pas mësova
se në këtë shtëpi kishte jetuar një farë
Antoine Peychaud, farmacist, që e kishte
zakon t’u servirte njerëzve një pije të përgatitur
sipas një formule që kishte marrë
në vendin e tij të lindjes, në San Domingo.
Bëhej fjalë për një përzierje konjaku,
sheqeri, vodke dhe drogash të tjera. Për
përbërësit me të cilat do të përgatiste
pijen, shërbente një njësi matëse e quajtur
“cocquetier”. Pikërisht nga kjo fjalë
mendohet se rrjedh edhe ajo e koktejlit.

Etimologjia
Etimologjia e fjalës koktejl akoma nuk
është e qartë edhe pse ekzistojnë hipoteza
të ndryshme mbi origjinën e saj. Kështu,
sipas asaj që mendohet, kjo fjalë
mund të ketë rrjedhur nga termat angleze
(cock) dhe (tail), ndoshta për faktin se, në
vitin 1400, në fshatrat angleze pihej një
pije e fortë dhe me shumë ngjyra, e cila të
sillte në qejf. Po ashtu mendohet se ajo
mund të ketë derivuar nga fjala franceze
“coquetier”, që është një mbajtëse për
vezët, e cila përdorej në Nju Orlins për të
servirur pije gjatë shekullit XIX. E fundit
është ajo që tregon për një anije të të pasurve
anglezë, e cila kur mbërriti në
Amerikën e Jugut e festoi duke pirë pije
evropiane dhe lëngje tropikale të përziera.


Çfarë është një koktejl dhe
si përgatitet ai?

Koktejl quhen të gjitha pijet që përfitohen
nga përzierja e dy ose më shumë
ingredientëve (përbërësve), ndërsa
numri maksimal i pijeve që mund të përzihen,
vendosur nga IBA (International
Bartenders Association) në vitin 1993,
është pesë. Përtej këtij limiti rrezikohet të
krijohet shumë konfuzion në shije dhe
aroma. Qëllimi që duhet të arrihet gjatë
përgatitjes së një koktejli është ai i të arriturit
të një shijeje të re nga përzierja e
produkteve me shije dhe karakteristika
të ndryshme. Shembulli më i arrirë është
ai me një piktor që, përmes ngjyrave bazë
dhe përzierjeve të tyre, arrin të krijojë qindra
ngjyra të reja. Por ashtu si piktori, i cili
nuk mund ta përziente kurrë të bardhën
me të zezën, edhe për baristët ekzistojnë
rregulla përzierjesh që duhen respektuar
patjetër. Gjithmonë si piktori, që edhe
pse mund të ketë vetëm tri ngjyra bazë
arrin të krijojë vepra arti me një pafundësi
sfumaturash të ndryshme, edhe baristët
me shumëllojshmërinë e produkteve
që gjenden sot në treg mund të krijojnë
një pafundësi kombinimesh të
ndryshme. Ndaj, për ta bërë sa më reale
botën e madhe të pijeve, ato ndahen në
kategori të ndryshme, sipas karakteristikave
kryesore. Por ashtu si të gjitha gjërat,
edhe mënyra e të pirit ndjek modën dhe i
nënshtrohet evoluimit të shijes. Kjo është
edhe arsyeja se përse shumë nga këto kategori
pijesh kanë ardhur duke u zhdukur,
ndërsa të tjera janë kthyer papritur në
modë dhe të tjera akoma u rezistojnë të
gjitha kohërave dhe pas 100 vjetësh bëjnë
akoma pjesë te “Best Seller”-ët. Të lindur
në Amerikë në fund të viteve 800 dhe në
fillimet e 900-ës, shumë prej tyre janë akoma
baza e pavdekshme e një numri të
madh koktejlesh, që sot përdoren aq
shumë nëpër lokale.
Sigurisht që rregullat për të përgatitur
një koktejl gjithmonë kanë qenë precize.
Duke menduar se i pari që nisi ta përdorte
ishte një farmacist, atëherë duhet të
mendohemi mirë, sepse dhe arti i të përzierit
të pijeve nuk është i lehtë. Kështu,
aktori John Barrymore, i famshëm për interpretimet
dhe për shijen e tij të çmendur
për koktejlet, kur ftonte dikë në bar i
thoshte pikërisht kështu: “Eja me mua te
profesori i matematikës”, ku donte të
theksonte se me sa saktësi dhe finesë
baristi i tij do t’ia përgatiste koktejlin. Një
koktejl kërkon gjithmonë të arrijë ekuilibrin
perfekt mes ingredientëve të ndryshëm.
Baza e tij është gjithmonë një pije
alkoolike si: uiski, konjaku, xhini etj., e më
pas shtohen përbërës të modifikuar që
kanë si funksion t’i japin atij shije të
hidhur, të ëmbël, aromatike apo të athët.
Shumë shpesh në formulën për përgatitjen
e tij është i pranishëm akulli, i cili
e bën disi më të lehtë shijen e tij. Po ashtu
mund të përdoren edhe elementë dekorativë
si: ullinjtë, qershitë, feta limoni dhe
portokalli, gjethe nenexhiku apo borziloku.
Të gjithë koktejlet kanë diçka që i
bën të ndryshëm nga njëri-tjetri, ndaj
mund të themi se baristët që i kanë ideuar
mund të konsiderohen si artistë të
vërtetë, ekspertë në harmonizimin e
shijeve dhe aromave. Çdo koktejl ka edhe
gotën e tij të veçantë. Kënaqësi, por edhe
lodhje për ata që i përgatisin. Sot koktejli
është një nga pijet më të dashura për t’i
ndezur akoma më shumë netët
përvëluese të verës. Kështu, ndërsa për
amerikanët është një e drejtë nga e cila
nuk mund të heqin dorë, për evropianët
është një nga mrekullitë e tjera të botës
dhe kënaqësitë më të mëdha të jetës.
Pikërisht te kjo e fundit qëndron edhe
sekreti. Ashtu si të gjitha gjërat e mira që
shijohen ngadalë, edhe koktejli nuk
mund të përjashtohej. Ndoshta shumë
pak njerëz e dinë, por i madhi Ernest
Heminguej e kishte muzën e vet, ndaj
thoshte gjithmonë: “Miojito im i dashur,
je ti ai që më jep forcë, sidomos kur nuk
kam durim të shkruaj ndonjë germë. Përfundimisht,
unë përulem para teje”.

DISA LLOJE
KOKTEJLESH

Manuali i parë i kompletuar, që përfshinte receta të ndryshme koktejli, i takon vitit 1862,
i quajtur “The bartender guide: how to mix drinks”, i banakierit të njohur Xherry Tomas


COSMO STRAIGHT

30 ml Vodka absolut
0.5 ml Triple Sec
10 ml lëng limoni
25 ml Cranberry juice
Të gjithë ingredientët hidhen në përzierës, 3 e
katërta e të cilit është mbushur me akull. Përziheni
fort, pastaj hidheni në një gotë të ftohtë


VODKATINI SPLASH

50 ml Vodka Ciroc
10 ml Vermouth Dry
1 ulli jeshil
Përbërësit përzihen me akull. Shërbehet në gota
me akull, duke hedhur edhe një ulli brenda.


LAB BLU

10 cl shampanjë
2 cl Margarita mix
0.5 cl shurup “tropikal Blu”, që vendoset në fund të gotës
2 cl vodka blu (në sipërfaqe)
1 lugë e vogël lëng limoni
Hidhen sipas radhës në gotë, ndërsa në fund i
shtohet shumë akull.


ANGEL FACE

50 ml Gin Gordon
15 ml Apricot brandy
15 ml Calvados
Të gjithë përbërësit hidhen në përzierës njëkohësisht.
Serviren në një kupë me akull.


WHY NOT

50 ml Gin Beefeter
15 ml Brandy
10 ml Lillet Blanc
10 ml lëng limoni
I lë të gjithë përbërësit në frigorifer për një kohë të
gjatë. Përzihen fort dhe serviren menjëherë.


PURPLE HAZE

50 ml Tranqueray
5 ml Opal Nera black sanbuka
2.5 ml sheqer i shkrirë
Përzihen fort dhe vendosen në një kupë me akull.
Shoqërohet edhe me ndonjë kokërr qershie.


HEAVENLY MOJITO

4.5 cl tekila
10 gjethe nenexhik i freskët
Gjysmë limoni
1 lugë sheqer
Limoni, nenexhiku dhe sheqeri vendosen veç, lihen
për pak kohë bashkë, ndërsa më vonë shtohet tekila
dhe akulli. Në fund, sërish nenexhik për zbukurim
dhe aromë.


ANGELS TEMPTATION

4.5 cl tekila
9 cl lëng molle i freskët
1.5 cl lëng i freskët portokalli
0.75 cl lëng i freskët limoni
Hidhen përbërësit në një gotë me akull. Pasi tunden
fort, shërbehen në gota të gjata, të shoqëruara me
feta molle jeshile.


FUMOIR

1 të dytat Bourbon whiskey
1 të katërtën Cohiba
1 të katërtën shurup sheqeri
Hidhen në një gotë të fortë, tunden mirë dhe serviret
i ftohtë


ORCHIDEA

40 ml Tanqueray
10 ml lëng limoni
20 ml lëng luleshtrydhesh
Pak sheqer i shkrirë
I krijuar në inaugurimin e një hoteli në Milano, njihet
edhe me emrin “Koktejli italian”. Përzihen fort,
serviren në kupa me akull.

Përzierja
Qëllimi që duhet të arrihet gjatë përgatitjes së një koktejli është ai i
të arriturit të një shijeje të re nga përzierja e produkteve me shije
dhe karakteristika të ndryshme



Message edited by dj_diamant - Wednesday, 2007-08-15, 11:21 AM
 
Forum » Arti & Kultura » Kuzhina Shqiptare » Disa koktail qe perdoren ne Baret shqipatre por dhe jashte t
Page 1 of 11
Search:


Copyright MyCorp © 2016

Website builderuCoz